Udhëheqësja e Shoqatës Krimet e Luftës Gjakova ‘98-’99, Shkëndije Hoda, në një bisedë me Edita Doli, në emisionin “Radar” në Radio Dukagjini ka folur për disa nga sakrificat dhe përjetimet që pati gjatë luftës së fundit në Kosovë.
Duke ditur se Shkëndija, vajza e familjes Hoda nga Gjakova që dha shumë për lirinë e Kosovës, ka shumë përjetime të luftës, ajo kërkoi nga të gjithë që lufta dhe krimet e kryera nga forcat serbe ndaj popullatës shqiptare, të mos harrohen asnjëherë.
Por, Hoda nuk është e kënaqur me Kosovën sot, sidomos me mbrojtjen e vlerave të luftës.
Pavarësisht se si familje dhanë shumë për çlirimin e Kosovës, Hoda thotë se është një pikë ujë në oqean, duke respektuar të gjithë popullin shqiptar për secilin kontribut veç e veç.
“Në gjithë këtë histori, unë jam një pikë ujë në Oqean. Edhe sot e ruaj fjalën e nënës që thoshte se të vritesh për liri është gjëja më e bukur. Por, kjo nuk është Kosova e pasluftës që ne e menduam. Lufta e UÇK-së, po nëpërkëmbet. Politika na ka shkapërdherdh. Nuk rregullohet shteti pa qenë populli unik. Andaj, kërkoj që populli të jetë i unifikuar, ta vlerësojnë lirinë, të respektojnë të gjitha kategoritë e dala nga lufta, sepse gjithsecili e ka rolin e vet dhe kur këto të përmbledhen vjen fjala liri. Sa më të bashkuar të jemi, aq më e fortë është liria”, ka thënë Hoda për Radio Dukagjini.
Duke folur për dëshmitë që ka siguruar për dhunimin e grave gjatë luftës në Kosovë, Hoda ka hedhur kritika ndaj Tribunalit të Hagës dhe Gjykatës Speciale.
“Grumbullimi i dëshmive të grave të dhunuara për javë të tëra nga forcat serbe gjatë luftës 98-99, ka qenë proces shumë i vështirë. Në vitet 1999-2000, zyrtarë nga Tribunali i Hagës, plaçkitën dokumente nga zyra ime. Kam kërkuar nga presidenti i Tribunalit të Hagës, të më kthehen dokumentet, por përgjigjja ka qenë se personat e dyshuar janë nga një zyre private pranë tribunalit të Hagës. Pra, këtu është problemi se Tribunali i Hagës, i fsheh dosjet e vërteta që kanë ndodhur në Kosovë. Njejtë po bën sot edhe Gjykata Speciale, duke u munduar të njollosë luftën e drejtë të luftëtarëve të UÇK-së” ka thënë Hoda.
Shkëndije Hoda, ishte vetëm 25 vjeçare kur i’u bashkua Ushtrisë Çlirimtare të Kosovës në detyrën e informimit dhe logjistikës. Ishte pjesëmarrëse në Betejën e Çabratit, ku humbi shumë bashkëluftëtarë, fati i një pjesë të madhe të tyre edhe pas dy dekadave ende nuk dihet.