Kryetari i Partisë Demokratike të Kosovës(PDK), Memli Krasniqi ka njoftuar se ka pritur në takim ambasadorin e Zvicrës në Kosovë, Thomas Kolly.
Krasniqi ka thënë se kanë diskutuar për zhvillimet politike në vend dhe bashkëpunimin mes Kosovës dhe Zvicrës.
“Në kuadër të këtij takimi, theksuam domosdoshmërinë e kultivimit të partneritetit mes dy shteteve tona, me ç’rast nënvizova edhe rolin e bashkatdhetarëve tanë në mërgatë, që kanë kontribuuar ndër vite në ruajtjen e këtyre raporteve të mira, si dhe kanë ndihmuar zhvillimin ekonomik të Kosovës përmes remitancave dhe investimeve”, ka shkruar kryetari i PDK-së, Memli Krasniqi.
Mes tjerash Krasniqi ka shtuar se e ka falënderuar ambasadorin Kolly për mbështetjen e vazhdueshme që Zvicra i ka dhënë Kosovës, “si shtet mik dhe partner strategjik”.