Dy persona kanë pësuar lëndime trupore, si pasojë e një aksident trafiku që ka ndodhur mëngjesin e së mërkurës në autostradën “Ibrahim Rugova”.
Lajmin për RTV Dukagjinin e ka konfirmuar zëdhënësi i Policisë së Kosovës, Baki Kelani, i cili ka theksuar se në këtë aksident janë përfshirë dy vetura.
“Rreth orës 08:40, policia është njoftuar për një aksident trafiku të ndodhur në autostradë, segmentin Suharekë -Duhel në kilometrin e 33-të. Njësia policore nga vendi i ngjarjes njofton se në aksident janë përfshirë dy vetura, dhe si pasojë e aksidentit dyshohet se dy persona kanë pësuar lëndime dhe janë dërguar për tretman mjekësor”, ka thënë Kelani.
Ndryshe, gjatë 24 orëve të fundit në Kosovë janë raportuar, gjithsej, 45 aksidente trafiku me dëme materiale, dhe 20 me të lënduar.
Në raportin 24 orësh të policisë thuhet se gjatë 24 orëshit të fundit policia ka arrestuar, gjithsej, 15 persona, dhe shtatë ka dërguar në mbajtje.