Presidenti kroat, Zoran Milanoviq ka thënë se ”perëndimi e ka aneksuar Kosovën prej Serbisë“, dhe kjo deklaratë është kritikuar në opinion publik në Kroaci.
Për këtë deklaratë ka reaguar kryeministri i Kroacisë, Andrej Plenkoviq, i cili është shprehur se Kroacia e ka njohur Kosovën dhe se është shtet sovran.
“Sa jam unë në dijeni askush nuk e ka aneksuar Kosovën. Asnjë shtet. Kosova është shtet i pavarur të cilin e ka njohur Kroacia. Aneksim është kur Rusia okupon territor të Ukrainës, organizon referendum të rrejshëm dhe ia bashkon ato pjesë Rusisë. Kosova është shtet i pavarur, sovran, që e kemi njohur. Askush nuk e ka aneksuar“, ka thënë kryeministri i Kroacisë, Andrej Plenkoviq.
Kreu i ekzekutivit ka theksuar se “për fat të mirë miqtë tanë në bashkësinë ndërkombëtare dhe shtetet mike e dinë se çfarë ndodhë në Kroaci dhe cilat janë qëndrimet e kujt”.
Presidenti kroat Milanoviq tashmë është shndërruar në “hero” nëpër mediat serbe, derisa deklarata e tij se ”Kosova është aneksuar“ po cilësohet si skandal diplomatik.