Në vazhdën e diskutimeve të ashpra në mes të pozitës dhe opozitës në Kuvendin e Kosovës, ku po diskutohet për Asociacionin e komunave me shumicë serbe, ka reaguar edhe deputetja e PDK-së, Ganimete Musliu.
Ajo i është drejtuar kryeministrit Albin Kurti, duke i thënë se kur të vendosë ta pranojë marrëveshjen për Asociacionin t’i kujtojë ish-aktivistët e Lëvizjes Vetëvendosje të cilët nuk jetojnë më.
Musliu i përmendi aktivistët Arben Xheladini dhe Mon Balaj, të cilët u vranë nga forcat e UNMIK-ut më 10 shkurt 2007-të në protestat e Lëvizjes Vetëvendosje, kundër “Pakos së Ahtisaarit”.
Po ashtu, Musliu e përmendi edhe Astrit Deharin, vdekja e të cilit është ende duke u hetuar.
“Albin, çfarë të duash bëj me Zajednicën e ke shumicën bëj çka do, je i mençur i gjithëdijshëm i di obligimet tua. Po dua të ta kujtoj një send, para se ta nënshkruash Zajednicën mos e harro Arben Xheladinin, Mon Balajn dhe Astrit Deharin. Mos i harro se i ke harruar që dy vjet se nuk i ke përmendur”, ka deklaruar Musliu.
Deputetja e PDK-së pati edhe kërkesa të tjera për Kurtin, siç është rritja e pagave, përjashtimin e Martin Berishajt nga Ambasada e Kosovës në Kroaci si dhe ndaljen e ikjeve masive të qytetarëve të Kosovës në vendet perëndimore.