Kërkesa e ministrit të Financave, Hekuran Murati, për faljen e tatimit në pronë nga komunat deri në vlerën 100 euro, po del të jetë e pamundur ligjërisht.
Të paktën kështu thuhet në një dokument i cili po qarkullon në rrjete sociale, e i cili fillimisht u postua nga ish-ministrja e Financave nga radhët e LDK-së, Hykmete Bajrami.
Departamenti Ligjor i MF-së, i ka dërguar një shkresë një kryetari të njërës nga komunat e Kosovës, duke ia bërë të ditur se falja e tatimit në pronë nuk mund të bëhet.
Një gjë të tillë e ka konfirmuar edhe Asociacioni i Komunave të Kosovës. Në njoftimin e tyre thuhet se komunat nuk kanë kompetencë për faljen e tatimit në pronë.
“Pas shqyrtimit te kujdesshëm të dispozitave të Ligjit Nr. 06/L-005 për Tatimin në Pronën e Paluajtshme (në tekstin e mëtemë: LTPP), ju informojmë se legjislacioni aktual nuk autorizon komunën për falje të pagesës së tatimit në pronë”, thuhet në dokument.
Sipas këtij dokumenti, pagesa e tatimit në pronë është e detyrueshme, ajo mund të shtyhet por jo edhe të falet.
Mundësia e vetme për falje të tatimit sipas Deparatamentit Ligjor të MF-së është një akt juridik që ka fuqinë juridike të ligjit.
“Në kapitullin e VI të LTPP-së evidentohet se pagesa e tatimit në pronë është e detyrueshme. Më tej, ky kapitull përmban edhe autorizime për shtyrje të pagesës por jo edhe të faljes. Andaj, vlerësojmë se për një falje të tillë, duhet një akt juridik që ka fuqinë juridike të ligjit. Për qëllime të ilustrimit, një situatë e ngjashme ishte adresuar përmes miratimit të Ligjit Nr. 05/L-043 për Faljen e Borxheve Publike, ku u miratua një ligj i cili ka autorizuar shprehimisht faljen e borxhit”, thuhet në dokument.
Ndryshe me vlerësimin e ri të pronave, i cili sipas MF-së ishte bërë në vitin 2018, qytetarët detyrohen të paguajnë tatimin në pronë me rritje 100 për qind.
