Këtë të shtunë janë bërë 19 vjet nga themelimi i gjigantit teknologjik “Facebook”.
Më 4 shkurt të vitit 2004, është themeluar nga Mark Zuckerberg, Facebook, një rrjet lidhjesh shoqërore në internet, të cilin Zuckerberg e themeloi së bashku me katër shokët e tij të dhomës, Eduardo Saverin, Andrew Mçollum, Dustin Moskovitz dhe Chris Hughes, të cilët po studionin në Universitetin e Harvardit.
Kësisoj që nga 4 shkurti i vitit 2004 ka ndryshuar edhe mënyra e komunikimit në botë.
Çfarë do të thotë “Facebook”?
Vjen nga një togfjalësh për libër të dhënash udhëzuese lëndësh mësimore, me të cilin pajisen studentët në disa universitete amerikane.
Themeluesit në fillim e kishin kufizuar anëtarësimin në Facebook vetëm për studentët e Harvardit, por më vonë e zgjeruan për universitetet Boston, Stanford, Yale dhe Princeton.
Fillimisht ky rrjet u hap për studentët në kolegje e universitete të tjera, pastaj për nxënësit e shkollave të mesme dhe më pas u përhap kudo në botë.
Në vitin 2012, Facebook u vlerësua si një kompani biznesi me vlerë prej 104 miliardë dollarësh.
Facebook paraqet një rrjet social ku përdoruesit mund të postojnë komente, të ndajnë fotografi, lajme, përmbajtje interesante, mund të luajnë lojëra, të bisedojnë drejtpërdrejtë e mbi të gjitha edhe të ndajnë video të drejtpërdrejta.
Facebook ofron mundësi të shumta, madje përmbajtjet mund t’i zgjedhë vetë përdoruesi nëse dëshiron t’i ketë publike, private, për një person apo vetëm për miq.