“E pranoi planin franko-gjerman, pa pasur guxim të thotë se cili është në të vërtetë ai plan, çfarë përmban, sa pika, sa prej tyre, pika kompromisi e sa në favor të Kosovës dhe në përputhje me kushtetutën”.
Kështu i ka reaguar, shefi i Grupit Parlamentar të PDK-së, Abelard Tahiri, kryeministrit, Albin Kurti.
Kurti, pas takimit me të dërguarin special të Bashkimit Evropian për dialogun Kosovë-Serbi, Miroslav Lajçak, ka thënë se Kosova e pranon propozimin e BE-së për normalizimin e marrëdhënieve me Serbinë.
“Shkëmbim i mirë me të dërguarin special të BE-së, gjatë një drekë pune në Prishtinë. Ne do ta pranojmë propozimin e BE-së për normalizimin e marrëdhënieve ndërmjet Kosovës dhe Serbisë dhe do ta konsiderojmë atë një bazë të mirë për diskutime të mëtejshme dhe një platformë solide për të ecur përpara”, ka shkruar Kurti në Twitter.
Tahiri ka ironizuar edhe me kushtet e Kurtit që i kishte përmendur para katër ditësh në seancën e Kuvendit të Kosovës në lidhje me formimin e Asociacionit.
“…katër ditë rezistencë prej letre dhe kushtet e Kurtit, me gjasë do të mbahen mend për avullim në kohë rekord. Kosovë urime themelimi i Zajednicës, dhuratë nga kryeministri, shkëlqesia e tij z. Albin Kurti”, ka përfunduar ai.