Vizita e presidentit të Shteteve të Bashkuara të Amerikës, Joe Biden, në Ukrainë, për ish-ambasadorin amerikan në Kosovë, Greg Delawie, solli shpresë.
Me anë të një postimi në Twitter, Delawie ka thënë se kjo ia kujton Kosovën, kur Biden në cilësinë e zëvendëspresidentit, e pati vizituar vendin.
“Biden sjell shpresë në Ukrainë. E mbaj në mend kur zëvendëspresidenti Biden solli shpresë në Kosovë duke kaluar një ditë së bashku me ne në Ambasadën në Prishtinë në vitin 2016-të”, tha Delawie.
#BidenBringsHope to Ukraine. I remember when VP Biden brought hope to #Kosovo in 2016 and spent a day with us at @USEmbPristina. https://t.co/xQpFZ3woLc
— Ambassador Greg Delawie (@GregDelawie) February 20, 2023
Biden, të martën do të konsultohet me aleatët nga krahu lindor i NATO-s në Poloni.
Siç raporton Associated Press, Biden pasi bëri një vizitë të paparalajmëruar në Kiev, shkoi në Varshavë të hënën me një mision për të forcuar unitetin perëndimor.
“Mendova se ishte kritike që të mos kishte asnjë dyshim, asnjë lloj dyshimi, për mbështetjen e SHBA-së për Ukrainën në luftë”, ka thënë Bideni teksa qëndronte me presidentin ukrainas Volodomyr Zelensky në Kiev përpara se të nisej për në Poloni.
“Populli ukrainas është rritur në një mënyrë që pak njerëz e kanë bërë ndonjëherë në të kaluarën”, ka shtuar ai.
Bideni është planifikuar të takohet të martën me presidentin polak, Andrzej Duda, dhe të mbajë një fjalim nga kopshtet e Kështjellës Mbretërore të Varshavës, ku pritet të theksojë angazhimin e vendit të Evropës Qendrore dhe aleatëve të tjerë ndaj Ukrainës gjatë vitit të kaluar.
Në Ukrainë, presidenti Biden u takua me presidentin Volodymyr Zelenskyy, një gjest solidariteti që vjen disa ditë para njëvjetorit të nisjes së agresionit rus në Ukrainë.
Në Kiev, presidenti amerikan njoftoi për një ndihmë prej gjysmë miliardë dollarësh shtesë nga SHBA, përfshirë predha, raketa antitankë, radarë të mbikëqyrjes ajrore dhe ndihma të tjera, por jo armatime të reja të avancuara. Banorët e Kievit thanë se mbetën “pa fjalë” dhe ishin “të gëzuar” pas vizitës së papritur të presidentit Biden.
Misioni i presidentit amerikan me vizitën në Kiev, e cila u bë përpara një udhëtimi të planifikuar në Poloni, ishte të theksonte se Shtetet e Bashkuara janë të përgatitura të qëndrojnë me Ukrainën “për aq kohë sa duhet” për të zmbrapsur forcat ruse.