Presidentja e Kosovës, Vjosa Osmani, e ka dekoruar Kontingjentin e Forcës së Sigurisë së Kosovës për shërbimin në zonat e prekura nga tërmeti në Turqi.
Sipas saj, përpjekjet e FSK-së, jo vetëm që i kanë ndihmuar njerëzit, por kanë treguar se janë të aftë të mbrojnë kombin “ndaj kërcënimeve të jashtme”.
Osmani ka theksuar se Ushtria e Kosovës njihet për trimëri, për shërbim ndaj shtetit dhe ndaj popujve vëllazërorë.
“Ushtarakët tanë janë përfshirë në operacionet e kërkim-shpëtimit duke punuar pa ndërprerë për t’i gjetur të mbijetuarit dhe për t’u ofruar ndihmë të plagosurve. Përpjekjet humanitare të ushtrisë sonë, jo vetëm që i kanë ndihmuar njerëzit tanë, por gjithashtu kanë dëshmuar kapacitetet e shtetit tonë për t’u dalë në ndihmë miqve. Veprimet e tyre kanë treguar se ushtria, jo vetëm që është e aftë të mbrojë kombin tonë ndaj kërcënimeve të jashtme, por gjithashtu është e përkushtuar për t’i ofruar mbështetje edhe kombeve mike”, ka thënë Osmani, shkruan EO.
Ambasadori i Turqisë në Kosovë, Tunç Angılı, tha se Turqia i është mirënjohëse Kosovës për ndihmën e dhënë pas tërmetit.
“I jemi mirënjohës popullit të Kosovës për ndihmën e ofruar popullit tonë. Ky akt tregon se miqësia jonë është e fuqishme dhe solide, prandaj ju falënderoj të gjithëve”, ka thënë ambasadori turk në Kosovë.