Kryetari i Parlamentit të Kosovës, Glauk Konjufca, gjatë të premtes së 24 shkurtit, ka pritur në takim ambasadorin e sapoemëruar turk, Sabri Tunç Angılı.
Gjatë takimit mikpritës, Konjufca e uroi ambasadorin turk, Angılı, në detyrën e re, dhe ritheksoi marrëdhëniet e mira mes dy vendeve “ bazohen në miqësi të kamotshme, partneritet strategjik dhe respekt të ndërsjellë”.
Konjufca i shprehu ngushëllime për viktimat e tërmeteve që goditën Turqinë, duke theksuar se populli i Kosovës qëndron pranë popullit turk në këto ditë të vështira.
“Kryetari i Kuvendit vlerësoi lart mbështetjen e vazhdueshme që ky vend mik i ka dhënë dhe vazhdon t’i japë shtetit të Kosovës” thuhet ndër të tjera në komunikatën zyrtare të Kuvendit.
Ndërsa, ambasadori i ri turk, Sabri Tunç Angılı, gjatë takimit, ka deklaruar se shteti i Turqisë do të vazhdojë ta përkrahë shtetin e Kosovës për anëtarësim në Këshillin e Evropës dhe në Nato, si dhe në institucione e organizma të tjerë ndërkombëtarë.