5 persona janë ndaluar nga Njësia për Ndërhyrje të Shpejtë (NjNSh) e Drejtorisë Rajonale të Kufirit-Veriu në Bistricë, pas lëvizjeve të dyshimta në Jarinjën e Poshtme.
Përmes një komunikate, Policia e Kosovës bën të ditur se të pesë të dyshuarit janë hasur duke tentuar të fusin në Kosovë një automjet të ngarkuar në një rimorkio, duke i ikur kështu obligimeve doganore.
“Më 24 shkurt 2023 rreth orës 03:00, njësitë policore të NjNSh-së, derisa ishin në vëzhgim dhe kontrollim të terrenin në brezin kufitar – Jarinje e Poshtme, kanë vërejtur lëvizje (drita të automjetit) të dyshimta në atë zonë. Policia menjëherë ka organizuar një plan taktik me qëllim të ndaljes së atij automjeti. Kështu, në malet e fshatit Bistricë, ka arritur të ndalojë pesë persona, të cilët dyshohet se kishin hyrë në territorin e vendit përmes rrugëve ilegale. Ata janë hasur duke tentuar të fusin në vendin tonë një automjet, të ngarkuar në një rimorkio, duke i ikur obligimeve doganore”, thuhet në njoftim.
Tashmë, rasti është duke u trajtuar nga njësitet përkatëse policore nga Drejtoria Rajonale Kufitare Veriu.