Aktivistë e anëtarë të Lëvizjes, veprimtarë të çështjes kombëtare, asamblistë dhe anëtarë të kryesisë së Qendrës së Prishtinës, kanë bërë homazhe te varri i tribunit të kombit, Adem Demaçi dhe te varri i aktivistit Astrit Dehari, me rastin e ditëlindjes së tyre.
Në njoftimin e LVV-së me Qendër në Prishtinë, thuhet se “Baca Adem ishte dhe mbetet frymëzim për ne”.
“Është shembulli më i mirë se si njeriu i sfidon kufinjët personalë të rezistencës e të qëndrueshmërisë kur është në pyetje atdheu dhe kombi”.
Kurse për Astritin, në njoftim thuhet se “ është modeli i aktivistit të palodhshëm e të drejtë, që udhëhiqet nga parime dhe ideale të pastra e të larta”.
“Drejtësia e plotë dhe e pavonuar për Astritin është obligim e qëllim i padiskutueshëm. Periudha, forma e kapacitete të ndryshme të aktivitetit, por ideale e qëllime të ngjashme: liri e çlirim, zhvillim e bashkim. Të paepur e të pathyeshëm – ashtu siç ishit ju – do të vazhdojmë rrugën që ju e ndriçuat, të bindur në drejtësinë e idealeve tona. Lavdi viganit të rezistencës shqiptare, Adem Demaçi! Lavdi aktivistit e shokut tonë të dashur, Astrit Dehari”, thuhet në njoftim.
Ndryshe, Demaçi vdiq më 26 korriku të vitit 2018-të.
Kurse, Dehari – aktivisti i Lëvizjes Vetëvendosje, i cili kohë më parë u arrestua dhe po qëndronte i burgosur në burgun e Prizrenit, kishte ndërruar jetë më pesë nëntor të vitit 2016.