Deputetja e Partisë Demokratike të Kosovës (PDK), Blerta Deliu-Kodra, ka deklaruar se dakordanca e së hënës ndërmjet Kosovës dhe Serbisë nuk është garanci se do të lëvizë pozicioni i Kosovës në marrëdhëniet ndërkombëtare.
Deliu-Kodra në një postim në rrjetin social “Facebook” ka shkruar se vetëm njohja e ndërsjellë do t’i shërbente Kosovës.
“Marrëveshja e dakorduar në fakt, nuk ofron asnjë garanci nëse do të lëvizë pozicionin e Kosovës në marrëdhëniet ndërkombëtare, pos që siguron avancimin e pozitës serbe në Kosovë në shkallë autonomie në lidhje të drejtpërdrejtë me Serbinë, që në Kushtetutën e saj mban Kosovën si pjesë të saj integrale. Vetëm njohja e ndërsjellë do t’i shërbente Kosovës si kundërargument ndaj shteteve dhe organizatave, të cilat kontestojnë shtetësinë e Kosovës duke i mohuar vendin e merituar në hapësirën ndërkombëtare”, ka deklaruar ajo.