Analisti Visar Ymeri ka thënë se Asociacioni i Komunave me shumicë serbe tashmë ka kaluar, por se si do të quhet, mbetet të shihet.
I ftuar në “Debat Plus” të RTV Dukagjini, Ymeri ka thënë se tashmë kreu i ekzekutivit kosovar i ka thënë “po” formimit të Asociacionit.
“Zajednica ka kaluar, tash a do ta ketë emrin ‘Zajednicë’ a ndryshe kjo mbetet të shihet, por më është pranuar mendoj unë. Logjika e cila thotë se për komunitetin serb në Kosovë duhet të ketë autonomi të veçantë, e cila është edhe e organizuar territorialisht dhe besoj do ta gjejë mbështetjen dhe siguresën e vet juridike, momentin kur mbaron ky proces i negocitatave”, ka deklaruar Ymeri, gjersa ka theksuar se “ tashmë Kurti i ka thënë po procesit të Asociaconit”.
Krahas kësaj, ai ka thënë se mospajtimi në Bruksel qëndronte te sekuenca kohore, se a do duhej të realizohej së pari Asocacioni, pastaj plani franko-gjerman, anasjelltas apo të dy njëherit.
Ndonëse marrëveshjet për Asocacionin u arritën në vitet 2013 dhe 2015, ishte Gjykata Kushtetuese, ajo e cila tha se marrëveshja e fundit nuk ishte në harmoni të plotë me Kushtetutën.
Serbia vazhdon të insistojë në themelimin e Asociacionit, por Qeveria e Kosovës e kundërshton një Asociacionin njëetnik, i cili, sipas saj, do të mund të krijonte një nivel të ri të pushtetit.
Nga ana tjetër, kryeministri i Kosovës, Albin Kurti dhe presidenti i Serbisë, Aleksandar Vuçiq, u takuan më 27 shkurt në Bruksel, me ç’rast, u pajtuan se nuk kanë më nevojë të diskutojnë për propozimin evropian për normalizimin e raporteve në mes dy vendeve.