Pas lirimit nga akuza nga Gjykata Themelore e Prishtinës, ka reaguar kryetari i FFK-së, Agim Ademi, i cili ka thënë se “në fund triumfoi e drejta”.
Ademi tha se ka qenë i akuzuar padrejtësisht për veprat që nuk i ka bërë.
“Gjykata Themelore në Prishtinë, me rastin e shpalljes së aktgjykimit lirues, ka theksuar faktin se me asnjë provë nuk është vërtetuar që unë kam kryer ndonjë vepër penale, për të cilën kam qenë i akuzuar padrejtësisht për më shumë se 10 vjet”, ka thënë ai.
Ai e ka falënderuar familjen e tij dhe avokatët, të cilët, sipas tij “kontribuan në zbardhjen e së vërtetës”.
Në fund, ai është zotuar se do ta “vazhdoj angazhimin tim në ngritjen e futbollit të Kosovës në nivelet më të larta dhe të kontribuoj në përmirësimin e infrastrukturës sportive në Kosovë”.
Ademi e Rama akuzoheshin se më 2012 kanë kërcënuar dhe sulmuar të dëmtuarin Dritro Kadolli, të cilit i kanë kërkuar që t’iu japë 30 mijë euro ose një veturë të llojit “BMW5”.
Më 2019, ata ishin shpallur fajtorë për veprën penale “detyrim në tentativë”. Agim Ademi atëherë ishte dënuar me 9 muaj burgim efektiv.
Kurse pas kthimit të lëndës në rigjykim, Ademi është shpallur i pafajshëm.