Ministri i Financave, Hekuran Murati, ka bërë të ditur se këtë të enjte është ekzekutuar mbështetja për punëdhënësit privatë që ua rritën pagat e afër 17 mijë punëtorëve.
“Sot është ekzekutuar mbështetja për punëdhënësit që kanë rritur pagat e 16,996 punëtorëve në sektorin privat, masë me të cilën kemi subvencionuar 50% të rritjes së pagës për 3 muajt e parë”, ka njoftuar ai.
Kreu i Financave ka thënë se me përfundimin e kësaj mase është shënuar edhe përfundimi i të gjitha masave të Pakos për Përballje me Inflacionin.
Inflacioni ka rënduar buxhetet e familjeve gjithandej, por sipas Muratit asnjë qeveri e rajonit nuk ka pasur një pako kaq të madhe e kaq gjithëpërfshirëse si Pakoja për Përballje me Inflacionin që ka zbatuar Qeveria aktuale e Kosovës.
Ndër të tjera, ai ka bërë të ditur se nga Pakoja për Përballje me Inflacionin kanë përfituar mbi 284 mijë pensionistë, mbi 24 mijë familje në asistencë sociale, mbi 75 mijë zyrtarë publikë, mbi 208 mijë qytetarë kanë përfituar mbështetje për kursimin e energjisë, mbi 66 mijë studentë e mbi 12 mijë punëtorë të ndërmarrjeve publike.