Ish-zëvendësministri i Punëve të Jashtme, Anton Berisha, ka thënë se marrëveshja e mbrëmshme e arritur në Ohër mes kryeminsitrit Kurti dhe presidentit Vuçiq është “rezultat i dakordimit të politikës transatlantike që të përmbyllet tregimi i pafundmë i dialogut që mund të zgjaste pakufi”.
“Ashtu siç e tha mbrëmë komisioneri Borrelli, çështja Kosovë- Serbi nuk është vetëm çështje e tyre e as vetëm rajonale, por është çështje europiane dhe si duket kjo qasje do të jetë mundësi e shpëtimit të rajonit për të permbyllur sagën e konflikteve dhe për të hyrë në rrugën e jetës europiane me në qendër paqen dhe humanizmin”, ka thënë Berisha.
“Kurreshtja e politikanit Albin Kurti për të ditur së çfarë është presioni ndërkombëtar u shua në variantin më të keq për të, duke u pajtuar që të mohojë gjithë karrierën e tij politike dhe duke pranuar zbatimin e asaj çfarë e kishte kundërshtuar çdo ditë në dhjetë vitet e fundit”, ka shkruar Berisha.
Berisha ka thënë se me këtë pranim “mbyllet cikli i sjelljeve dhe lojërave pseudopatriotike si mënyrë e ardhjes në pushtet dhe fillon rruga e të bërit politikë reale që mund t’i mundësojë Kosovës të kalojë prej gjendjes aktuale bllokuese e të hyjë në rrugën e integrimit euroatlantik”.
“Në qoftë së qeveria aktuale dhe shoqëria i kuptojnë mirë detyrat e marra dhe i zbatojnë ato në koordinim me aleatët tanë SHBA dhe BE-në, atëherë jeta e qytetarëve të Kosovës do të përmirësohet për çka është edhe qëllimi kryesor i politikës pavarësisht përkatësisë partiake. Opozita nuk ka pse të imitojë Kurtin kur ai vetë ka hequr dorë nga vetvetja, opozita duhet të marrë përgjegjësinë por edhe meritat për progresin e Kosovës, si në të kaluarën, ashtu edhe në të ardhmen, për të implementuar projektin madhor shqiptar të integrimit euroatlantik si e vetmja alternativë e kombit shqiptar si dhe e komuniteteve të tjera për shtetin e Kosovës”, ka thënë tutje Berisha.