Kryeministri i Kosovës, Albin Kurti, i shoqëruar nga ministrja e Arsimit, Arbërie Nagavci dhe ministri i Zhvillimit Rajonal, Fikrim Damka, të hënën kanë vizituar shkollën Fillore të Mesme të Ulët “Elena Gjika”, në shënim të përvjetorit të mësimit në gjuhën turke.
Sipas njoftimit nga Zyra e Kryeministrit, shefi i ekzekutivit ka thënë se sot bëhen 72 vjet prej se qytetarët e Kosovës patën mundësinë të mësojnë edhe në gjuhën turke, teksa ka theksuar se ndjehet krenar për këtë traditë kaq të gjatë të shumëgjuhësisë në vend dhe për mundësinë që fëmijët në Kosovë të mësojnë në gjuhën e tyre amtare.
Para stafit mësimdhënës të kësaj shkolle, kryeministri Kurti ka thënë se janë të lumtur që vjet Qeveria ka gjetur zgjidhje për të ofruar tekste shkollore mësimore edhe të tilla, që janë cilësore dhe në gjuhën turke.
Po ashtu, ai përmendi edhe Strategjinë e Arsimit për vitet 2022-2026, e cila përfshin subvencione të vazhdueshme për hartimin, rishikimin, përkthimin dhe përshtatjen e teksteve mësimore dhe materialeve të tjera në gjuhën turke, por edhe në gjuhët e komuniteteve të tjera joshumicë që jetojnë në Republikën e Kosovës.
“Ne gjithashtu do të ofrojmë mundësi për studentët që mësojnë gjuhët, siç mund të jetë dhe gjuha turke për shqiptarët këtu në Prishtinë, sepse duhet të mësojmë gjuhët e njëri-tjetrit. Të kuptojmë më mirë e bashkëpunojmë më shumë. Edhe individët edhe shteti përfitojnë më shumë nga avantazhet në tregun ndërkombëtar, si dhe solidaritet në nivel të Republikës kur njerëzit kanë mundësi të komunikojnë me njëri-tjetrin”, ka thënë Kurti.