Kryetari i Grupit Parlamentar të Partisë Socialiste, Taulant Balla, e ka dënuar vrasjen e punëtorit të sigurisë të mediumit Top Channel.
Sipas Ballës, sulmi i sotëm është një akt tepër i rëndë dhe që kërkon një kundërpërgjigje të qartë dhe të fortë nga shteti.
Ai ka thënë se duhet të bëhet ç’është e mundur për identifikimin dhe dënimin e autorit apo autorëve të krimit.
“Sulmi terrorist ndaj televizionit më të madh kombëtar, ku mbeti i vrarë punonjësi i sigurisë Pal Kola, është një akt tepër i rëndë dhe që kërkon një kundërpërgjigje të qartë dhe të fortë nga shteti. Duhet bërë çmos në identifikimin e autorëve dhe për një ndëshkim model, në mënyrë që ngjarje kriminale të këtij lloji kundër medias së lirë të mos ndodhin më. Ngushëllime familjes së madhe Top Channel, për humbjen e një pjesëtari të kësaj kompanie të madhe mediatike të gjithë shqiptarisë. Si kryetar i Grupit Parlamentar të Partisë Socialiste në Kuvendin e Shqipërisë, i shpreh solidaritetin e plotë Lori Hoxhës dhe të gjithë punonjësve të Top Channel në këtë moment kaq shqetësues”, ka thënë ai.
Televizioni shqiptar, Top Channel, është përballur me një situatë të rëndë mesnatën e së dielës, ku është qëlluar me armë zjarri në drejtim të rojës së sigurimit nga persona ende të paidentifikuar.
Roja i sigurisë, Pal Kola, ka humbur jetën, pasi u qëllua me armë rreth orës 01:00, në rrethana ende të paqarta.
Në autostradën e Kavajës, te vendi i quajtur “Përroi i Agait”, është gjetur një automjet i djegur tip “Range Rover”, i cili dyshohet se u përket autorëve. Sipas informacioneve, targat e automjetit rezultojnë të vjedhura.