Kryeministri i Kosovës, Albin Kurti, së bashku me presidenten e Kosovës Vjosa Osmani kanë përkujtuar të rënët në Masakrën e Izbicës, që u masakruan 24 vjet më parë nga regjimi serb gjatë luftës në Kosovë.
Kryeministri Kurti së bashku me presidenten Osmani janë përkulur para pllakës përkujtimore e para qëndresës së familjarëve.
“U përkulëm para pllakës përkujtimore e para qendresës së familjarëve. Mirënjohës për forcën e familjarëve që dëshmuan në Tribunalin Ndërkombëtar për Krimet e Luftës në ish-Jugosllavi, në proceset kundër Millosheviqit dhe udhëheqësve të tjerë të Serbisë”, ka thënë Kurti.
Kurti ka rrëfyer se si pas rrethimit të fshatit, forcat e Serbisë masakruan 147 burra, pleq dhe fëmijë, ndërsa të masakruarit u zhvarrosën nga Izbica, u varrosën në varreza masive ku disa prej të vrarëve u gjetën në Petrovo Selo në Serbi.
“24 vite pas, ka ende varre të zbrazëta të atyre që ende janë të zhdukur”, ka thënë Kurti.
Ndër të tjera, kreu i Qeverisë së Kosovës ka thënë se ky është përvjetori i parë pa Mustafë Dragajn, i mbijetuar dhe dëshmitar i kësaj masakre.
Ndryshe, forcat policore dhe ushtarake serbe, pas rrethimit të mijëra civilëve të fshatit Izbicë dhe vendbanimeve përreth, veçuan 147 burra të rinj dhe pleq, të cilët i vranë dhe i masakruan, ndërsa pjesën tjetër e dëbuan jashtë Kosovës.
Izbica shihej si vend i sigurt për banorët e shumë fshatrave të Skenderajt, që ishin të ekspozuar ndaj sulmeve të serbëve. Mijëra shqiptarë kishin shkuar aty, më 27 mars të vitit 1999.
Atë ditë i ishin nënshtruar granatimit, e të nesërmen, gati të gjithë meshkujt e rritur kishin ikur në male, duke i lënë kryesisht gratë, fëmijët, dhe burrat e vjetër në një lëndinë të fshatit.
Ishte ditë Bajrami.
Rreth 200 burra po qëndronin në lëndinë, duke pritur nga çasti në çast pushtimin e fshatit.
Kur policë, ushtarë e paramilitarë kishin mbërritur te civilët, atyre ua kishin plaçkitur paratë dhe të gjitha gjërat e vlefshme, duke i ndarë gratë nga burrat.
Gratë dhe fëmijët u urdhëruan të merrnin rrugën për në Shqipëri, kurse burrat u ekzekutuan gati të gjithë. Kishte edhe gra që u qëlluan.
Pas masakrës, kufomat e të vrarëve i varrosën në Izbicë meshkujt që ishin strehuar në mal, por, forcat serbe i zhvarrosën më pas, duke i dërguar në lokacione të ndryshme në Kosovë e Serbi.
Nga 156 të ekzekutuarit, deri tani janë identifikuar 131 prej tyre. Kanë mbetur edhe 15 të tjerë, varret e të cilëve akoma presin kthimin.
Masakra në Izbicë hyn në radhën e krimeve më të rënda të shtetit të Serbisë, ku vrasja masive, përdhosja e trupave dhe varrimi i tyre, përmes pamjeve satelitore, u bë lajm botëror.