“Kosova zyrtarisht është shteti kandidat për organizimin e Lojërave Mesdhetare ‘Prishtina 2030’”.
Kështu ka njoftuar kryeministri i vendit, Albin Kurti, në konferencë për media pas takimit me Komitetin Olimpik të Kosovës, të martën e 4 prillit.
Kryeministri Kurti ka thënë se organzimi i lojërave mesdhetare në Kosovë do të shënojë moment historik dhe jo vetëm.
“Lojërat 2030 shënojnë edicionin e 21-të të kësaj ngjarjeje multisportive, e cila i bën bashkë sportistët dhe qytetarët e 26 shteteve të tri kontinenteve, të cilat preken nga ujërat e Mesdheut”, ka thënë tutje Kurti, teksa bëri të ditur se këto lojëra do të organizohen në bregdetin shqiptar.
“Jemi pajtuar me Shqipërinë që këto lojëra të organizohen në bregdetin shqiptar”.
“Mirëpritja e këtyre lojërave në Kosovë në vitin 2030 pasqyron vizionin e Qeverisë së Republikës së Kosovës për të ardhmen e të rinjve tanë. Konsolidimi i imazhit shtetëror në arenën ndërkombëtare, përforcimi i përkatësisë dhe identitetit shtetëror, infrastrukturë fizike e modernizuar, ekonomi e ringjallur përmes krijimit të vendeve të reja të punës dhe zhvillimit të turizmit sportive…këto janë disa nga përfitimet direkte të Kosovës përmes këtij organzimi”, ka theksuar kreu i ekzekutivit.
Ai tutje ka potencuar se së bashku me Komitetin Olimpik të Kosovës (KOK), do të punojë “me shumë kënaqësi dhe entuziazëm” që në vitin 2030 të mirëpresim Komitetin Sportiv nga tri kontinentet e Mesdheut.