Një kërkesë i është drejtuar Zyrës së Presidentes nga ana e Këshillit Prokurorial të Kosovës, që Osmani të dekretojë Blerim Isufaj në pozitën e kryeprokurorit të Shtetit.
Me anë të një njoftimi në faqen zyrtare të tyre, KPK ka thënë se një kërkesë e tillë vije pas shterimit të të gjitha rrugëve ligjore që vërtetojnë se procesi për rekrutimin e pozitës së kryeprokurorit të Shtetit ka qenë i drejtë dhe legjitim.
“Në kuadër të kompetencave kushtetuese dhe ligjore, Këshilli Prokurorial i Kosovës njofton opinionin publik se sot iu ka drejtuar Zyrës së Presidentes së Republikës së Kosovës me kërkesë për dekretimin e z.Blerim Isufaj në pozitën e kryeprokurorit të Shtetit. Kjo kërkesë është bërë duke marrë parasysh se janë shterur të gjitha rrugët ligjore që kanë rezultuar se procesi për rekrutimin e pozitës së kryeprokurorit të Shtetit ka qenë i drejtë dhe legjitim. Andaj, duke vlerësuar lart angazhimin e Zyrës së Presidentes në tërë këtë proces dhe rolin e saj si garantuese e funksionimit të institucioneve të vendit, si dhe duke besuar në qëndrimin e përbashkët që të kemi institucione me funksionalitet të plotë, KPK-ja ka kërkuar që procesi i dekretimit të kryeprokurorit të Shtetit të trajtohet me urgjencë dhe të sigurohet zbatimi i Kushtetutës së Republikës së Kosovës”, thuhet në njoftim.
Tutje, KPK ka theksuar se dekretimi i kryeprokurorit të Shtetit është esencial për sistemin prokurorial dhe në përgjithësi për sundimin e ligjit në vend, dhe si rrjedhojë, institucioneve u nevojitet një kryeprokuror i Shtetit.
Tashmë shënohen pothuajse një vit qëkur vendi i kryeprokurorit të shtetit ka mbetur pa të zot. Ndonëse KPK-ja pati votuar Isufajn për këtë pozitë, presidentja e Republikës së Kosovës, Vjosa Osmani, nuk e ka trajtuar çështjen.