Qeveria e Kosovës e ka caktuar 14 prillin si Ditë Memoriale të të Mbijetuarve të Dhunës Seksuale gjatë luftës së fundit në Kosovë.
Kjo u bë pas votimit që ndodhi në mbledhjen e së mërkurës të Qeverisë së Kosovës.
Kryeministri i Kosovës, Albin Kurti, gjatë mbledhjes së Qeverisë, tha se duke e njohur dhimbjen dhe vuajtjen e të mbijetuarve të dhunës seksuale, kanë ardhur me këtë vendim.
Ai tha se ky vendim është për njohjen e dhimbjes dhe vuajtjen e viktimave të kësaj dhune gjatë luftës së fundit, shkruan EO.
“Shqyrtimi i propozim-vendimit për caktimin e 14 prillit si ditë memoriale e të mbijetuarve të dhunës seksuale gjatë luftës së fundit në Kosovë. Duke e njohur dhimbjen dhe vuajtjen e grave dhe vajzave edhe të burrave dhe djemve si të mbijetuar të dhunës seksuale, në bashkërendim me presidenten e Kosovës, zonjën Vjosa Osmani-Sadriu, propozojmë caktimin e datës 14 prill si ditë memoriale e të mbijetuarve të dhunës seksuale gjatë luftës së fundit në Kosovë”, tha Kurti.