Veteranët e luftës të Ushtrisë Çlirimtare të Kosovës, kanë paralajmëruar protesta nëse Kuvendi i Kosovës, i ndryshon ligjet që do t’i linte ata pa rritje të pensioneve sikurse që është rritur paga minimale.
Përfaqësuesi i veteranëve të UÇK-së, Faton Klinaku, të mërkurën mbrëma u ka bërë thirrje deputetëve të kuvendit që të mos i votojnë ndryshimet e ligjit që do t’i linte pensionet e veteranëve kështu siç janë.
“Kjo qeveri mashtruese, duhet ta ketë parasysh se me këtë po bën edhe shkelje kushtetuese. Prandaj, deputetë të nderuar, ju bëj thirrje që mos t’iu përdorë, Albin Kurti, si mashë e kundër vlerave të lirisë, dhe ta keni parasysh se kjo gjë do të kundërshtohet me protesta nga ana jonë”, ka shkruar Klinaku në Facebook.
Në seancën e së enjtes të kuvendit, në rend dite do të jetë shqyrtimi i parë i projektligjit për ndryshimin dhe plotësimin e ligjeve që caktojnë shumën e beneficionit në lartësi të pagës minimale, procedurat e caktimit të pagës minimale dhe shkallët tatimore në të ardhurat personale vjetore.
Ministri i Financave, Hekuran Murati, kishte deklaruar se disa kategori nuk do të përfshihen në ligjet që do të miratohen për rritjen e pagës minimale nga 170 në 250 euro neto.
Sipas tij, kategoritë e veteranëve të Luftës së UÇK-së, ai për Personat e Verbër, për Statusin dhe të Drejtat e Personave Paraplegjikë dhe Tetraplegjikë dhe ai për Tatimin në të ardhurat personale nuk do të përfitojnë nga rritja e pagës minimale.