Kryetari i Kuvendit të Republikës së Kosovës, Glauk Konjufca, ka uruar festën e Fitër Bajramit, me ç’rast ka bërë thirrje që të përkushtohemi më shumë drejt një të ardhmeje më të mirë në Kosovë.
Me anë të një postimi në Facebook, Konjufca ka uruar që festa e Fitër Bajramit të sjellë më shumë gëzim, shëndet dhe prosperitet në familjet kosovare.
“Si përfundim i Ramazanit, ne sot shënojmë Festën e Bajramit. Në këto ditë të veçanta hareje, paqja, harmonia dhe lumturia duhet të jenë prioriteti ynë kryesor. Duke e vizituar dhe përqafuar njëri-tjetrin, le të ndajmë mikpritjen, dashurinë dhe mirënjohjen mes nesh, ashtu siç ndajmë edhe ëmbëlsirat. Shpresojmë që kjo festë të sjellë më shumë gëzim, shëndet dhe prosperitet për ju dhe familjen tuaj. Të udhëhequr nga kjo dashuri, të përkushtohemi edhe më shumë për të ndërtuar një të ardhme më të mirë dhe më të qëndrueshme në Kosovë dhe më gjerë”, ka shkruar ai.
Fitër Bajrami është festa e cila bëhet pas mbarimit të muajit të Ramazanit. Emri Fitër Bajram vjen nga ajo se myslimanët para ditës së bajramit shpërndajnë lëmoshë, solidarizohen me të varfrit, kështu për ta festuar së bashku këtë festë.