Kryetari i KQZ-së, Kreshnik Radoniqi, ka bërë të ditur se tashmë ka filluar numërimi i fletëvotimeve nga procesi i zgjedhjeve në veri.
Ai tha se ky proces nuk ka pasur ndonjë incident të theksuar, dhe se sa i përket anës teknike dhe organizative, gjithçka ka shkuar në rregull.
Ai njoftoi se vetëm një pjesë e vogël prej 3.47 për qind të 45 mijë e 95 qytetarëve që kanë të drejtë vote në katër komunat e veriut të Kosovës kanë votuar në zgjedhjet e jashtëzakonshme të mbajtura të dielën në Leposaviq, Zubin-Potok, Zveçan dhe Mitrovicë të Veriut.
Tutje, ai ka treguar për secilën komunë numrin e votuesve që kanë marrë pjesë.
“Të gjitha qendrat e votimit janë mbyllur, anëtarët e këshillit janë duke e bërë numërimin e fletëvotimit. Nr i qytetarëve që kanë votuar: Leposaviq, 141 votues apo 1.06%, Zubin Potok 385 votues, apo 8.18%. Zvecan, 204 votues apo 2.92%. Mitrovicë e Veriut 837 votues apo 4.62 %”, ka thënë ai.
Radoniqi bëri të ditur se rezultatet pritet të publikohen pas orës 20:00.