Kryeministri i Kosovës, Albin Kurti, ka reaguar pasi Kosova kaloi me sukses fazën e parë të anëtarësimit në Këshillin e Evropës (KiE).
Kreu i Qeverisë së Kosovës ka thënë se pas përmbylljes së kësaj etape, Kosova do të jetë vlerë e shtuar për Këshillin e Evropës, ndërsa KiE do t’i shtojë vlerë demokracisë, të drejtave të njeriut dhe sundimit të ligjit.
“Komiteti i Ministrave të shteteve anëtare, me mbi dy të tretat e votave të nevojshme, i dha sot mbështetje aplikimit të Kosovës në Këshillin e Evropës, duke përmbyllur kështu fazën e parë të anëtarësimit të plotë të Republikës sonë në këtë organizatë të rëndësishme ndërkombëtare. Shteti ynë do të jetë vlerë e shtuar për Këshillin e Evropës. Këshilli i Evropës do t’i shtojë vlerë demokracisë, të drejtave të njeriut dhe sundimit të ligjit në shtetin tonë”, ka shkruar Kurti.
Ai ka falënderuar Ministrinë e Punëve të Jashtme dhe Diasporës, ministren Gërvalla, zëvendësministrin Ahmeti dhe ekipet e tyre për punën e pandërprerë, si dhe partnerët e shtetet anëtare për përkrahjen.
Ndryshe, të hënën e 24 prillit, Komiteti Ministror i Këshillit të Evropës, i cili përfaqëson 46 shtete anëtare, me më shumë se 2/3 e votave mori vendimin që t’ia përcjellë Asamblesë Parlamentare të Këshillit të Evropës kërkesën për anëtarësim të Republikës së Kosovës.
Ministrja e Punëve të Jashtme e quajti këtë hap historik dhe më të rëndësishmin pas pavarësisë së vendit.
Kosova kalon fazën e parë të anëtarësimit në Këshillin e Evropës