Nipi dyshohet të ketë vrarë axhën e tij, si shkak i çështjeve pronësore, ndonëse kjo e fundit mbetet një dyshim fillestar i Policisë së Kosovës.
Lajmin për Dukagjinin e ka konfirmuar Drejtori Rajonal i Policisë në Gjakovë, Lumni Graishta.
“I dyshuari është nipi, ndërsa viktima është axha i tij. Dyshimet fillestare janë se deri te vrasja ka ardhur për shkak të një çështjeje pronësore, megjithatë këto janë vetëm dyshime fillestare”, ka deklaruar Graishta.
Ndërkaq, lidhur me rastin është arrestuar i dyshuari.
“Sot rreth orës 09:50 është raportuar për një rast vrasje në fshatin Kijevë-Malishevë. Në vendin e ngjarjes, menjëherë kanë dalë njësitet e nevojshme policore, ku është gjetur një person mashkull (i moshës madhore dyshohej pa shenja jete). Vdekjen e tij e ka konstatuar ekipi mjekësor në vendin e ngjarjes. Lidhur me rastin është arrestuar një i dyshuar, mashkull i moshës madhore”, ka thënë zëdhenësi i Policisë për rajonin e Pejës, Sheremet Elezaj.
Tutje, ky i fundit ka bërë të ditur se hetimet janë duke vazhduar në drejtim të veprës penale të vrasjes.