Nënkryetarja e Kuvendit të Kosovës, Saranda Bogujevci, lidhur me Deklaratën për të Zhdukur, të nënshkruar nga kryeministri Kurti dhe presidenti Vuçiq, ka thënë se pas mohimit 24 vjeçar, me këtë deklaratë Serbia pranon krimin e zhdukjes me forcë.
“Me këtë deklaratë e ngritë nevojën urgjente për përpjekje shtesë për të lehtësuar vuajtjet e familjeve. Gjithashtu për herë të parë pranon të ofrojë qasje në të gjitha materialet që do të ndihmojnë në gjetjen e personave të zhdukur me forcë – qofshin këto edhe materiale të klasifikuara”, ka shkruar Bogujevci.
Bogujevci ka shtuar se Republika e Kosovës është e përkushtuar për të zbardhur zhdukjet me forcë gjatë luftës dhe “për t’i dhënë fund ankthit të pritjes së familjarëve për të ditur fatin dhe vendndodhjen e më të dashurve të tyre”.
“Deklarata e sotme na sjellë një hap më afër të vërtetës. Shpresojmë që ky hap i rendesishëm do të lehtësojë sado pak dhimbjen e familjarëve”, ka shtuar ajo.