Presidentja e Kosovës, Vjosa Osmani, ka përkujtuar akademikun Fehmi Aganin në 23-vjetorin e vrasjes së tij.
E para e vendit, ka thënë se profesor Agani ka qenë figurë përbashkuese, dhe politikan konsistent me vizion të qartë për rrugën që duhet ta ndiqte Kosova.
Mes tjerash, presidentja Osmani ka shtuar se ai ka qenë i angazhuar një jetë të tërë në përmbushjen e synimit për shtetin e Kosovës.
“Si dorë e djathtë e presidentit historik, dr.Ibrahim Rugova, profesor Agani dha kontribut të çmueshëm, në afirmimin e çështjes së Kosovës në arenën ndërkombëtare”, ka thënë ajo.
Sipas saj, aktiviteti kombëtar i Aganit, u ndal më 6 maj 1999, kur forca të regjimit gjenocidal serb e vranë njërin nga strategët e lëvizjes paqësore.
“Vënia e autorëve para drejtësisë është synimi ynë i vazhdueshëm”, thuhet tutje në përkujtimin e Osmanit.
Ndryshe, edhe Kryetari i Lidhjes Demokratike të Kosovës(LDK), Lumir Abdixhiku ka përkujtuar, nënkryetarin e LDK-së, dijetarin e madh shqiptar, Prof.Fehmi Agani, në 23- vjetorin e vrasjes së tij.
”Sot, bëhen 23 vjet nga vrasja e ideologut, intelektualit dhe dijetarit të madh shqiptar, Prof. Fehmi Agani. Si shkrimtar, si gazetar, si politolog, si sociolog e mbi të gjitha si atdhetar i madh, profesor Agani ishte pjesë e gjeneratës së artë intelektuale e politike shqiptare në Kosovë gjatë fundshekullit të kaluar”, ka shkruar Abdixhiku në rrjetin e tij social, Facebook.
Fehmi Agani u lind në Gjakovë në vitin 1932, ku dhe mbaroi shkollimin fillor, ndërsa u vra më 6 maj të vitit 1999, nga forcat pushtuese serbe.
Abdixhiku: Fehmi Agani ka qenë si dora e djathtë e presidentit Rugova