Të premten, para protestuesve në Zveçan ka folur Natasha Aksenitijeviq nga Autoriteti i Përkohshëm Komunal, i cili punon në sistemin serb. Ai ka thënë se “ata janë penguar të ofrojnë shërbime për qytetarët dhe se janë të rrezikuar”.
Në ndërtesën komunale në Zveçan, e cila është siguruar nga KFOR-i që nga e hëna, është vendosur kryetari i ri shqiptar, ku më parë punohej vetëm sipas sistemit serb.
Serbët atje po protestojnë sepse nuk e pranojnë kryetarin shqiptar, i cili i fitoi zgjedhjet lokale të prillit në Kosovë. Këto zgjedhje komuniteti serb i ka bojkotuar.
“Ajo që kërkojmë është që forcat speciale të largohen menjëherë nga ndërtesa, që ne të kthehemi në zyrat tona dhe të vazhdojmë punën tonë… dhe të mos vijë ai kryetar fals në Zveçanin tonë se ne nuk e kemi zgjedhur”, ka thënë Aksentijeviq, raporton REL.
Ndërkohë, siç ka raportuar ekipi në terren i RTV Dukagjinit, situata për momentin është e qetë në Zveçan, dhe po ashtu protesta po vazhdon e qetë nën tingujt e këngëve nacionaliste serbe.
Ndërkohë, trupat e KFOR-it po vazhdojnë të qëndrojnë përreth objektit komunal.
Në protestën e cila ishte më masive sesa ajo e së enjtes, morën pjesë edhe punonjës të arsimit, përfshirë shkollat dhe fakultetet, shëndetësinë, punonjës të organeve të përkohshme dhe institucioneve të tjera publike që punojnë sipas sistemit të Serbisë.
Në emër të mësimdhënësve foli Ana Galjak, mësuese në shkollën e mesme në Zveçan, e cila tha se “të gjithë fëmijët kanë të drejtë për paqe”.
“Kushtet këtu janë të pamundura për punë, të pamundura që fëmijët tanë të qëndrojnë në shkollë”, ka deklaruar ajo.
Institucionet arsimore në Kosovë në zonat serbe punojnë sipas sistemit serb.
Disa protestues serbë në Zveçan ngritën pankarta, ku shkruan: “Nuk do të na dëboni nga shtëpitë tona”, apo “Duam paqe, jo gaz lotsjellës e shok-bomba”.
Ata nuk nxorën asnjë provë që do t’i mbështeste pretendimet e tyre për dëbimin.
Protestuesit në komunat me shumicë serbe në veri të Kosovës, prej ditësh protestojnë kundër kryetarëve shqiptarë.