Kryeministri i Kosovës, Albin Kurti, ka pritur në takim këtë të premte koordinatoren rezidente të Kombeve të Bashkuara në Kosovë, Arnhild Spence.
Në këtë takim u diskutua rreth bashkëpunimit të ngushtë me UNKT, ndërkohë që u rikonfirmua gatishmëria për thellimin e mëtejmë të këtij bashkëpunimi si dhe tejkalimin e sfidave të përbashkëta.
“Znj. Spence përsëriti gatishmërinë e 17 agjencive të Kombeve të Bashkuara që janë të pranishme në Kosovë për të mbështetur synimet e Qeverisë së Kosovës dhe vlerësoi lart bashkëpunimin e deritanishëm, i cili ka rezultuar që Kosova të ketë projekte të përbashkëta me organizatat e Kombeve të Bashkuara në vlerë deri në 46 milionë dollarë vitin e kaluar”. njofton Kryeministria.
Në takim u diskutua edhe për mënyrat e intensifikimit të bashkëpunimit.
Spence theksoi gatishmërinë e Kombeve të Bashkuara për të mbështetur iniciativat e Qeverisë për arsimin gjithëpërfshirës dhe paqebërës, dhe ndau rezultatet e analizës së UNDP-së për nevojat e familjeve të prekura nga përmbytjet.
“Pjesë e bisedimeve gjatë këtij takimi me Kryeministrin ishte edhe diskutimi i mënyrave me të cilat mund të punojnë agjencitë e OKB-së bashkë me qeverinë në mbështetje të fermerëve të vegjël të prekur nga përmbytjet”, thuhet tutje në njoftimin e Kryeministrisë.