Ambasadori amerikan në Kosovë, Jeff Hovenier, ka shprehur mirënjohjen e tij për miratimin e legjislacionit të reformës zgjedhore nga Kuvendi i Kosovës.
Ai e ka quajtur këtë hap të mirëseardhur si një shembull i rezultateve të mira që arrihen kur partitë punojnë së bashku dhe me partnerët ndërkombëtarë të Kosovës.
Ambasadori Hovenier gjithashtu ka theksuar se këto reforma harmonizojnë Kosovën më tej me standardet e Bashkimit Evropian dhe forcojnë normat demokratike.
“Unë e mirëpres miratimin e legjislacionit të reformës zgjedhore nga Kuvendi i Kosovës – një shembull i rezultateve të mira që rezultojnë kur partitë punojnë së bashku dhe me partnerët ndërkombëtarë të Kosovës. Këto reforma e harmonizojnë më tej Kosovën me standardet e BE-së dhe forcojnë normat demokratike”, ka shkruar ai në Twitter.
Me konsensus të partive politike të pozitës dhe opozitës, Kuvendi i Kosovës të enjten e ka miratuar Ligjin për Zgjedhjet e Përgjithshme në Republikën e Kosovës.
79 deputetë kanë votuar pro, tre kundër kurse abstenim nuk ka pasur.
Pas miratimit, kryetari i PDK-së, Memli Krasniqi, ka thënë se në ligjin e ri janë marrë parasysh rekomandimet e BE-së dhe të organizatave civile.
“Në Ligjin e ri janë adresuar rekomandimet e misioneve vëzhguese të BE-së, të KQZ-së dhe të organizatave të shoqërisë civile. Ndërkaq, një falënderim i posaçëm për ndihmën dhe mbështetjen e këtij procesi shkon edhe për partnerët ndërkombëtarë, Bashkimin Evropian, SHBA-në, Mbretërinë e Bashkuar, OSBE-në, e të tjera”, ka thënë ai.
Por, për këtë Ligj ka pasur vërejtje, organizata joqeveritare KDI.
Eugen Cakolli nga kjo organizatë ka thënë se “Miratimi i projektligjit për zgjedhje – ndër ligjet më kryesore pas Kushtetutës – në procedurë të përshpejtuar, është sa i gabuar, aq edhe i paarsyeshëm. Më shumë se konsensusal mbi avancimin e proceseve zgjedhore, ky është projektligj i kompromiseve të partive politike”.
Ai kishte shtuar se partitë janë bërë bashkë në dëm të integritetit zgjedhor.