Kryetari i Prishtinës, Përparim Rama, ka njoftuar se i ka ndarë titullin “Qytetar nderi i Prishtinës” Paddy Ashdown, ish-udhëheqësit të Liberal-Demokratëve të Mbretërisë së Bashkuar, i cili kontribuoi për pavarësinë e Kosovës.
Me anë të një postimi në Facebook, në Ditën e Çlirimit të Prishtinës, kreu i kryeqytetit ka thënë se Lordi Ashdown ishte udhëheqës, diplomat dhe luftëtar i drejtësisë, i cili ndikoi thellë në peizazhin politik në Mbretërinë e Bashkuar dhe në Kosovë, i cili e përkrahu pavarësinë e Kosovës që në vitin 1996.
“Institucioni i Kryeqytetit i ndan titullin “Qytetar Nderi i Prishtinës” Lordit britanik Paddy Ashdown, për kontributin e tij në luftën për drejtësi dhe pavarësinë e Kosovës. Paddy Ashdown ishte udhëheqës, diplomat dhe luftëtar i drejtësisë, i cili ndikoi thellë në peizazhin politik në Mbretërinë e Bashkuar dhe në Kosovë”.
“Ai kundërshtoi veprat mizore dhe përkrahu pavarësinë e Kosovës që në vitin 1996. Duke dëshmuar në gjykatën ndërkombëtare të Hagës dhe mbështetur intervencionet e NATO-s, ai u bë zëri i drejtësisë për Kosovën”, shtoi tutje numri një i kryeqytetit.
Rama njoftoi se këtë titull e ka pranuar e bija, Katherine Theurel. Lordi Ashdown shërbeu edhe si përfaqësues i lartë i Kombeve të Bashkuara në Bosnje-Hercegovinë, ndërsa vdiq më 23 dhjetor 2018.