Presidenti i Shqipërisë, Bajram Begaj, ka reaguar pas rrëmbimit të tre zyrtarëve policorë nga forcat serbe, të mërkurën e 14 qershorit.
Kidnapimin e tre efektivëve brenda territorit të Kosovë, Begaj e ka cilësuar si akt të rëndë dhe provokativ.
“Strategjitë ‘eskalim për të deeskaluar’ duhet të marrin fund. Rrëmbimi i tre efektivëve të Policisë së Kosovës brenda territorit kosovar nga trupat serbe është një akt i rëndë provokativ për destabilizimin e Kosovës dhe të mbarë rajonit”, shkroi Begaj në Facebook.
Begaj e ka dënuar aktin duke u bërë thirrje autoriteteve serbe për lirimin e efektivëve kosovarë.
“Gjithashtu iu bëj thirrje partnerëve ndërkombëtarë që të ndërhyjnë dhe të shkurajojnë veprime të tjera të ngjashme”, shtoi më tej ai.
“Një thirrje vëllazërore e bëj sërish për autoritetet e Kosovës për të mos rënë pre e provokimeve dhe për të dhënë kontributin e tyre për shtensionimin e situatës”.
Sipas tij, koordinimi me SHBA-në dhe BE-në për rikthimin në tryezën e dialogut është tepër i rëndësishëm.