Ministri i Punëve të Brendshme, Xhelal Sveçla, ka pritur në takim tre zyrtarët policorë kufitar Rifat Zeka, Beqir Sefi dhe Shemë Mustafa, të cilët ishin kidnapuar nga njësitet policore-ushtarake të Serbisë, në kohën kur ata ishin në detyrë zyrtare.
Në njoftimin e MPB-së thuhet se “ky rast i montuar ndaj pjesëtarëve të Policisë duhet të mbyllet pa kushte dhe në tërësi”.
“Serbia duhet të gjykohet për agresionin e saj”, citohet të ketë thënë ministri Sveçla, teksa theksohet se “gjendja e tyre shëndetësore fizike është relativisht e mirë por me vullnet të fortë dhe kurajë për të vazhduar detyrën në mbrojtje të kushtetutshmërisë dhe ligjshmërisë”.
Ai ka potencuar se që të tre zyrtarëve policorë në seancën gjyqësore në Kralevë i’u është konfirmuar aktakuza dhe janë liruar me procedurë të rregullt, çka nënkupton se ndaj të njëjtëve do të vijojnë thirrjet dhe përndjekjet nga Serbia.
Ministri Sveçla shprehi mbështetjen e të gjitha institucioneve të Republikës së Kosovës duke theksuar përkushtimin që ky rast i paprecedentë i Serbisë të mos kalojë pa përgjegjësi.