Ishte raportuar se e ndjera 67-vjeçare kishte ndërruar jetë si pasojë e lëndimeve të marra në një aksident në Samadraxhë të Suharekës.
Megjithatë, në raportin 24-orësh të Policisë së Kosovës, rasti ishte cilësuar si “vrasje nga pakujdesia”.
Në një përgjigje për Dukagjinin, zëdhënës i Policisë për rajonin e Prizrenit, Shaqir Bytyqi, ka treguar se pas aksidentit, i dyshuari ka dalë nga automjeti duke u fjalosur me palën tjetër. Eventualisht, ai e kishte shtyrë viktimën e cila është rrëzuar.
“Me datë 29.06.2023, rreth orës 21 e 50 , është raportuar një aksident trafiku mes dy automjeteve në fshatin Samadraxhë, KK Suharekë. Policia e ka trajtuar rastin e aksidentit, njëra nga pjesëmarrëset në aksident nga emergjenca është transportuar për në QKMF në Suharekë, rreth orës 21:54 në QKMF, mjeku kujdestar e ka vërtetuar vdekjen e viktimës, femër 67-vjeçare. Nga mbledhja e dëshmive nga vendi i ngjarjes dyshohet se viktima nuk ka ndërruar jetë si pasojë e lëndimeve nga aksidenti, por shkaqet e vdekjes deri më tani nuk dihen. Dyshohet se i dyshuari pas aksidentit ka dalë nga automjeti dhe janë fjalosur me palën tjetër, dhe në një moment e ka shtyrë viktimën e cila është rrëzuar”, ka deklaruar ai.
Tutje, Bytyqi thekson se shkaqet e vdekjes të së ndjerës nuk dihen, gjersa bën të ditur se i dyshuari është në mbajtje.
“Pra, deri më tani nuk dihen shkaqet e vdekjes, por prokurori kujdestar ka urdhëruar që të hapet rast ‘Vrasje nga pakujdesia’. I dyshuari nuk është intervistuar sepse ka qenë nën ndikim të alkoolit. Me urdhër të prokurorit kujdestar, i njëjti është ndaluar për 48 orë”, njoftoi ai.
Nga ana tjetër, raporti i PK-së bën të ditur se trupi i të ndjerës është dërguar në IML për obduksion.
“Lidhur me rastin e lartcekur është arrestuar dhe dërguar në mbajtje një person i dyshuar mashkull kosovar, ndërsa me urdhër të prokurorit trupi i pajetë i viktimës është dërguar në IML për obduksion. Rasti në procedurë hetimore”, thuhet në komunikatë.
Rasti ka ndodhur në Suharekë, mbrëmjen e së enjtes.