Ministri i Ministrisë së Mjedisit, Planifikimit Hapësinor dhe Infrastrukturës, Liburn Aliu, njofton se kjo ministri ka nënshkruar marrëveshje me UNDP-në, për bashkëpunim për veprime klimatike.
Aliu njofton se nga nënshkrimi i kësaj marrëveshjeje do të jenë tri rezultate kyçe. Ai radhiti të parën forcimin e strukturave politike, ligjore dhe institucionale, të nevojshme për zbatimin e Agjendës për Klimën dhe Mjedisin në Kosovë, me fokus të veçantë përshtatjen ndaj ndryshimeve klimatike.
“Zbatimin e projekteve pilot për promovimin e qëndrueshmërisë mjedisore dhe përshtatjes ndaj ndryshimeve klimatike, me potencial të lartë për zgjerim”, ka radhitur Aliu si rezultatin e dytë kyç nga kjo marrëveshje.
Ndërsa, si rezultatin e fundit kyç, Aliu e renditi mbështetjen e digjitalizimit të të dhënave mjedisore dhe forcimin e infrastrukturës digjitale për iniciativa të qëndrueshme dhe zhvillim të qëndrueshëm.