Policia e Mbretërisë së Bashkuar ka sekuestruar bimë kanabisi me vlerë prej 130 milionë paund, duke arrestuar kështu pothuajse 1000 njerëz.
Këtë operacion, BBC e ka cilësuar si goditjen më të madhe ndaj krimit të organizuar në këtë vend.
Më shumë se 180 mijë bimë u zbuluan në bastisjet në Angli dhe Uells, në qershor.
Oficerët konfiskuan gjithashtu 20 armë zjarri, 636 mijë euro në para të gatshme dhe 20 kg kokainë, me një vlerë të mundshme prej 1 milion eurosh.
Operacioni Mille synoi atë që forcat e rendit besojnë se është një makineri parash për bandat e krimit të organizuar (OCG), të cilat janë gjithashtu të përfshira në vepra të tjera, si shpërlarje parash, kontrabandë e drogës së klasit A dhe dhunë.
Kanabisi është një drogë e klasit B, jo e klasit A si heroina apo kokaina, por kultivimi i kanabisit në shkallë të gjerë shihet si një burim kryesor i të ardhurave të paligjshme për bandat kriminale.
Qëllimi i operacionit njëmujor ishte të prishte OCG-të duke hequr një burim kryesor të të ardhurave të tyre, duke kapur të përfshirët dhe duke mbledhur informacione se si funksionojnë rrjetet.
Steve Jupp, drejtuesi i Këshillit Kombëtar të Shefave të Policisë (NPCC) për krimin e rëndë dhe të organizuar, tha se operacioni kishte “ndërprerë me sukses një sasi të konsiderueshme të aktivitetit kriminal”.
“Ne e dimë se rrjetet e organizuara të përfshira në prodhimin e kanabisit janë gjithashtu të lidhura drejtpërdrejt me një sërë krimesh të tjera serioze, si importimi i drogës së klasës A, skllavëria moderne dhe dhuna dhe shfrytëzimi më i gjerë,” tha ai.
“Informacioni i mbledhur do të ndihmojë gjithashtu në informimin e zbatimit të ligjit të ardhshëm në të gjithë vendin.”
NPCC është një organ që bashkon udhëheqësit e forcave policore në MB për të vendosur drejtimin e politikave.