Kryetari i Partisë Demokratike të Kosovës (PDK), Memli Krasniqi, do të shkojë për një vizitë dyditore, nesër dhe pasnesër, në dy kryeqendrat evropiane, respektivisht Paris dhe Bruksel.
Në njoftimin e dhënë nga ana e kësaj partie është kumtuar lajmi se kryetari i PDK-së do të takojë shumë miq, aleatë dhe zyrtarë të lartë evropianë për të diskutuar në lidhje me situatën aktuale në Kosovë.
“Rrugëtimi i Kosovës, historikisht, nuk do të ishte kaq i suksesshëm pa mbështetjen dhe koordinimin me aleatët tanë”, thuhet në njoftimin në faqen e PDK-së.
Gjithashtu, partia më e madhe opozitare në Kuvend, PDK-ja, në shkrimin e tyre kanë theksuar se “angazhimi i Kryetarit Krasniqi për të ruajtur dhe kultivuar këto raporte, në shërbim të së ardhmes së sigurt të vendit tonë, është i përditshëm dhe i pandalshëm”.