Arbër Latifi, kameraman i gazetës online Nacionale, është sulmuar sot fizikisht nga sigurimi i spitalit në Gjakovë.
Sipas raportimeve të Nacionales, Latifi, së bashku me gazetaren Gentiana Hasani, kishin shkuar të raportojnë në lidhje me ndërprerjen e operacioneve.
“Latifi, së bashku me gazetaren Gentiana Hasani, kishin shkuar në Spitalin e Gjakovës për të raportuar rreth ndërprerjes së të gjitha operacioneve që ishte bërë me arsyetimin e temperaturave të larta”, thuhet në raportimin e Nacionales.
Ndërkaq, për sulmin ndaj kameramanit Arbër Latifi, ka reaguar edhe Asociacioni i Gazetarëve të Kosovës (AGK).
“Asociacioni i Gazetarëve të Kosovës shprehet tejet i shqetësuar me sulmin fizik ndaj ekipit të Nacionales dhe u bën thirrje organeve të drejtësisë ta trajtojnë me prioritet rastin”, thuhet në reagimin e AGK-së.