Komandanti i përgjithshëm i KFOR-it, Angelo Michele Ristucci të mërkurën është takuar me drejtorin e Policisë së Kosovës, Gazmend Hoxha.
Pjesë e këtij takimi ishin edhe shefi i EULEX-it, Giovanni Pietro Barbano e përfaqësues të zyrës së Bashkimit Evropian në Kosovë.
Sipas njoftimit të KFOR-it në Twitter, në këtë takim janë diskutuar masat që do të zbatohen për shtensionimin e situatës në veri.
The #KFOR #NATO-led Mission Commander, MG Angelo Michele Ristuccia, met with the Head of the European Union Rule of Law Mission in Kosovo @EULEXKosovo, Pietro Barbano @EulexHoM and the General Director of the @Kosovo_Police, Gazmend Hoxha. pic.twitter.com/1yueMtnzeU
— NATO Kosovo Force – KFOR (@NATO_KFOR) August 2, 2023
KFORI e ka vlerësuar këtë takim “pozitiv dhe konstruktiv” duke thënë se do të pasohet me takime të tjera.
“Ata diskutuan gjerësisht për masat e deeskalimit që do të zbatohen në afat të shkurtër nga institucionet në Kosovë. Takimi ishte pozitiv dhe konstruktiv dhe do të pasohet nga takime të mëtejshme periodike si në nivel teknik dhe ekzekutiv”, thuhet në njoftimin e KFOR-it.
Ndryshe, më 10 korrik, Lajçak dhe kryenegociatori i Kosovës në dialogun me Serbinë, Besnik Bislimi, kanë konfirmuar se në një takim në Bratisllavë kanë arritur marrëveshje për shtensionimin e situatës në veri.
Një ditë më vonë janë prezantuar edhe hapat konkretë, të cilët parashikojnë tërheqjen e 25 për qind të Policisë së Kosovës nga dhe rreth ndërtesave komunale në veri, organizimin e zgjedhjeve të jashtëzakonshme lokale në fund të verës dhe rikthimin në dialogun për normalizimin e marrëdhënieve midis Kosovës dhe Serbisë.