Të enjten, një 62-vjeçar me inicialet H.S., ka vdekur në Qendrën Klinike Universitare të Kosovës (QKUK) pas goditjeve të marra nga një veturë teksa ishte duke lëvizur me biçikletë të mërkurën në Ferizaj.
“Ndërsa, sot me datën 03.08.2023, rreth orës 02:00 nga Qendra Klinike Universitare e Prishtinës jemi njoftuar se ngasësi i biçikletës H.S ( M/K) i moshës 62-vjeçar, si pasojë e lëndimeve të rënda trupore në aksident komunikacioni, ka ndërruar jetë”, thuhet në njoftim.
Policia e Kosovës ka njoftuar se aksidenti u shkaktua nga vetura me targa vendore, të cilën e drejtonte 39-vjeçarja me inicialet B.S., e cila ka përplasur çiklistin.
62-vjeçari ishte dërguar menjëherë për ndihmë në Qendrën Emergjente në Ferizaj e pastaj në QKUK.
“Me datën 02.08.2023 rreth orës 13:50 kemi pranuar informatën se në rrugën ‘Riza Matoshi’ në Ferizaj është një aksident komunikacioni, ku ishin të përfshirë një veturë me targa vendore, të cilën e drejtonte B.S ( F/K) e moshës 39-vjeçare dhe një biçikletë të cilën e drejtonte H.S ( M/K) i moshēs 62-vjeçar. Për pasojë e këtij aksidenti, lēndime të rënda trupore pëson ngasësi i biçikletës, të cilin për ndihmë mjekësore e dërgojnë në Qendrën Emergjente në Ferizaj, e më pas për tretman të mëtutjeshëm mjekësor dërgohet në Qendrën Klinike Universitare në Prishtinë”, thuhet në njoftimin e policisë.
Me vendim të prokurorit të rastit, trupi i pajetë dërgohet në Institutin e Mjekësisë Ligjore (IML) në Prishtinë për obduksion, ndërsa e dyshuara B.S vazhdon të mbahet në qendrën e ndalimit për procedura të tjera hetimore.