Kryeministri i Kosovës, Albin Kurti, ka thënë se kryetema gjatë vizitës së tij në Tetovë dhe këtë të diel në Prizren ishte pikërisht rruga Prizren-Tetovë.
Me anë të një postimi në Facebook, Kurti ka thënë se kostoja e këtij projekti të madh infrastrukturor do të jetë rreth 200 milionë euro.
“Të premten në Tetovë. Sot në Prizren. Rruga Prizren-Tetovë është kryetema. Në bazë të parallogaritjeve, kostoja e këtij projekti të madh infrastrukturor do të jetë rreth 200 milionë euro. Prej tyre afër 150 milionë euro janë për tunelin 6.4 kilometërsh përmes malit të Korfit (Vërtopit), e që është përafërsisht 600 metra më i gjatë sesa ai i Kalimashit”.
Ndërkaq rreth 50 milionë euro do të kushtojë rruga në të dy anët e tunelit që do të lidhë këto dy qytete shumë të rëndësishme sa për aktualitetin e qytetarëve, aq edhe për potencialin ekonomik e turistik, shtoi Kurti.
Kreu i ekzekutivit të Kosovës ka thënë se kjo rrugë që nëpër Prevallë e Glloboçicë është e gjatë 113 kilometra dhe tani i merr më shumë se dy orë e gjysmë udhëtim do të jetë më e shkurtër se 50 kilometra e do të përshkohet për dukshëm më pak se një orë.