Kryeministri i Kosovës, Albin Kurti, ka bërë një përmbledhje të vizitës së tij zyrtare në Greqi.
Përmes një postimi në Facebook, shefi i ekzekutivit ka thënë se gjatë qëndrimit të tij në Athinë, përveç pjesëmarrjes në darkën me liderët e Ballkanit Perëndimor, ka zhvilluar takime të ndryshme.
“Para e pas saj, përgjatë dy ditëve zhvillova takime dypalëshe me kryeministrin e Kroacisë, Andrej Plenkovic, presidenten e Komisionit Evropian, Ursula von der Leyen dhe kryeministrin e Greqisë, Kyriakos Mitsotakis. Ndërkohë që në pritje të darkës u përshëndeta me presidentin e Ukrainës, Volodymyr Zelenskyy dhe bashkëbisedova me kryeministrin e Bullgarisë, Nikolai Denkov dhe presidentin e Këshillit Evropian, Charles Michel”, ka shkruar Kurti.
Kurti ka thënë se në darkën që shënonte edhe 20-vjetorin e Samitit të Selanikut është ritheksuar edhe një herë mbështetja për zgjerimin dhe anëtarësimin në Bashkimin Evropian, si dhe rruga përpara, teksa në prezencën e presidentit të Ukrainës, Zelenskyy siç thotë ai, u konfirmua mbështetja e palëkundur për Ukrainën dhe u bë thirrje për përgjegjësi dhe ndëshkim të krimeve të kryera gjatë luftës nga agresori rus.
Ndryshe, kryeministri Kurti në takim me kryeministrin grek, Kyriakos Mitsotakis, ka thënë se Kosova dhe Greqia gëzojnë marrëdhënie të mira, të cilat po përmirësohen vazhdimisht si në rrafshin ekonomik përmes rritjes së shkëmbimeve tregtare, ashtu edhe në rrafshin politik përmes vizitave të shpeshta të krerëve institucionalë të të dyja shteteve.
Kryeministri i Kosovës, Albin Kurti, të hënën e 21 gushtit, ka udhëtuar për në Athinë me ftesë të kryeministrit grek, Kyriakos Mitsotakis.
Siç njoftoi Kryeministria, Kurti shkoi për të marrë pjesë në darkën e ftuar nga kryeministri Mitsotakis për liderët e Ballkanit Perëndimor, e cila po mbahet në 20-vjetorin e Samitit të Selanikut dhe për të zhvilluar takime edhe me akterë tjerë.