Kryeministri i Kosovës, Albin Kurti, në vizitën e tij zyrtare në Detroit të Michigan, është takuar me shoqatën e bizneseve “Automation Alley”, ku bëri thirrje për investime në Kosovë.
I pari i ekzekutivit, tashmë më shumë se një javë, po qëndron në Shtetet e Bashkuara të Amerikës. Në Michigan është takuar me Drejtorin e Partneriteteve Strategjike Globale, Noel Bevshehir, me të cilin kanë diskutuar për industrinë 4.0, apo siç njihet ndryshe revolucioni i katër industrial.
“Kryeministri Kurti prezantoi para tyre mundësitë për investime në Kosovë, dhe për potencialin në rritje të vendit tonë në Teknologjinë e Informacionit. Ai i ftoi për vizitë në Kosovë për të hulumtuar nga afër mundësitë që tregu i Kosovës ofron”, thuhet në njoftim.
Kryeministri Kurti para tyre ka prezantuar mundësitë për investime në Kosovë dhe për potencialin në rritje të vendit tonë në Teknologjinë e Informacionit.
“Ai i ftoi për vizitë në Kosovë për të hulumtuar nga afër mundësitë, që tregu i Kosovës ofron”, vijon njoftimi.
Sipas njoftimit të zyrës së kryeministrit, thuhet se “shoqata e bizneseve ‘Automation Alley’ është lider në mesin e shoqatave të bizneseve për teknologji dhe prodhim, e cila bën lidhjen ndërmjet industrisë, akademisë dhe qeverisë për të përshpejtuar inovacionin dhe për të nxitur zhvillimin ekonomik të Michigan-it juglindor”.
Ndryshe, zëdhënësi i Qeverisë, Përparim Kryeziu, ka deklaruar se kryeministri Kurti gjatë qëndrimit të tij në SHBA, do të takohet edhe me zyrtarë politikë, senatorë e kongresmenë.
I ftuar në emisionin “Five” të RTV Dukagjinit, Kryeziu ka thënë se këto takime janë paraparë që prej fillimit, dhe do të bëhen të ditura ditëve në vijim.
Ai bëri të ditur se edhe gjatë javës tjetër, kryeministri Kurti do të qëndrojë në SHBA, për t’u takuar, sipas tij me investitor potencial, me mërgatën dhe zyrtarë politikë.