Në Dhomat e Specializuara të Kosovës (DHSK) në Hagë, gjykimi në rastin e njohur si Thaçi dhe të tjerët është duke vazhduar edhe këtë të martë.
Seanca e së martës ka filluar me dëshminë e dëshmitarit pa masa mbrojtëse, Agim Idrizit.
Idrizi është dëshmitari i 21-të në këtë çështje dhe do të dëshmojë për rrëmbimin dhe ndalimin e tij të pretenduar nga pjesëtarët e Ushtrisë Çlirimtare të Kosovës (UÇK) në vitin 1999.
I njëjti është duke u përgjigjur në pyetjet e prokurorit Pace dhe seanca po vazhdon në sesion publik.
Paraprakisht, kryetari i trupit gjykues, gjykatësi Charles Smith, ka bërë të ditur se Zyra e Prokurorit të Specializuar ka dorëzuar një parashtresë që është kërkesë për konferencë me anë të videos për dëshmitarin 03827.
Lidhur me këtë, ekipet mbrojtëse do të japin komentet e tyre gjatë ditës.
Ky proces gjyqësor ndjek akuzat kundër disa ish-krerëve të Ushtrisë Çlirimtare të Kosovës (UÇK), përfshirë Hashim Thaçin, Kadri Veselin, Rexhep Selimin dhe Jakup Krasniqin.
Në seancën e së hënës, pas dëshmisë së dëshmitarit të 20-të të Zyrës së Prokurorisë Speciale të Kosovës (ZPS), identifikuar si W04368, një dëshmitar i ri u paraqit në sallën e gjyqit dhe dëshmoi pa masa mbrojtëse.
Ky dëshmitar, pra, është Agim Idrizi, i cili vjen nga komuna e Kaçanikut. Dëshmitari ka rrëfyer detaje të pretenduara të rrëmbimit dhe të ndalimit të tij nga pjesëtarët e UÇK-së në vitin 1999.
Gjykimi ndaj ish-krerëve të UÇK-së nisi më 3 prill të vitit të kaluar, ndërsa të akuzuarit kanë deklaruar se janë të pafajshëm.
Lexo edhe: Gjykimi ndaj Thaçit dhe të tjerëve, kalohet në seancë private për të identifikuar disa persona
Gjykimi ndaj Thaçit dhe të tjerëve, dëshmitari pyetet për takimin me Demaçin dhe Kurtin
Aktakuza e parë kundër tyre u konfirmua më 26 tetor 2020 dhe u bë publike më 5 nëntor 2020. Sipas aktakuzës, krimet e paraqitura në të kryhen në periudhën nga marsi 1998 deri në shtator 1999, në disa vendndodhje në Kosovë, si edhe në qytetet e Kukësit dhe Çahanit, në Shqipërinë Veriore.
Ky rast gjyqësor ka tërhequr vëmendjen ndërkombëtare dhe është një hap i rëndësishëm në drejtim të drejtësisë dhe të llogaridhënies për ngjarjet në Kosovë gjatë konfliktit të viteve 1998-1999.