Kryeministri i Republikës së Kosovës, Albin Kurti, në Estoni ka takuar kryeministren Kaja Kallas, gjatë kohës që po mbahen punimet e Samitit të Partneritetit për Qeverisje të Hapur (OGP).
Ai për këtë takim ka shkruar në rrjetin social Facebook, ku ka thënë se ka diskutuar edhe për kontributin që Kosova mund të japë si anëtare e Partneritetit për Qeverisje të Hapur (OGP).
I pari i ekzekutivit gjatë samitit ka folur edhe për dialogun Kosovë-Serbi dhe përpjekjet nga aleatët e Rusisë për të shtrembëruar të vërtetën.
“Në Kosovë, përpjekjet nga aleatët e Rusisë për të shtrembëruar të vërtetën, të kaluarën dhe të tashmen, janë të dukshme dhe po intensifikohen”, ka theksuar kryeministri.
Kurti gjatë samitit “Open Government Partnership” në Talin të Estonisë ka thënë se këto veprime në Kosovë janë duke u intensifikuar.
“Në Kosovë, përpjekjet nga aleatët e Rusisë për të shtrembëruar të vërtetën, të kaluarën dhe të tashmen, janë të dukshme dhe po intensifikohen. Gjatë kohës së ndjeshme, kur shteti ynë është i përkushtuar në procesin e ndërmjetësuar nga Bashkimi Evropian dhe Shtetet e Bashkuara për të normalizuar raportet me fqinjin tonë verior, Serbinë, por edhe për përfshirjen e plotë të minoriteteve në proceset demokratike të shtetit, pa ndikim nga jashtë, këto kërcënime kibernetike, sikurse dezinformimi, bullizimi kibernetik dhe forma të tjera janë veçmas përcaktuese”, tha Kurti.