Deputetja e Partisë Demokratike të Kosovës (PDK), Blerta Deliu-Kodra, ka dorëzuar padi për shpifje ndaj ministres së Drejtësisë, Albulena Haxhiu.
Përmes një postimi në Facebook, Deliu-Kodra ka thënë se pret që deklaratat e ministres Haxhiu në studio televizive të marrin përgjigjen e merituar.
“Shpifjeve të pushtetit i përgjigjemi me padi. Në Gjykatë, sot kam dorëzuar padinë për shpifje ndaj ministres së Drejtësisë, Albulena Haxhiu – aty ku të pavërtetat e saj në studio televizive pres të marrin përgjigjen e merituar”, ka shkruar ajo.
Tutje, deputetja e PDK-së ka thënë se tendenca për zhvendosje të vëmendjes nga skandalet korruptive me anë të “shpifjeve e fyerjeve” nuk kalon.
“Tendenca që me shpifje dhe fyerje ndaj opozitës me e zhvendosë vëmendjen nga skandalet korruptive të kësaj qeverie, nuk kalon. As nuk frikësohemi e as nuk zmbrapsemi nga angazhimi ynë për të denoncuar krimin dhe korrupsionin e këtij pushteti. Shihemi në gjykatë, ministre”, ka vijuar ajo.
Ndryshe, ministrja Haxhiu kishte kërkuar shkarkimin e deputetes së PDK-së nga pozita e anëtares së Komisionit për kompensimin e viktimave të krimit, që funksionon në kuadër të ministrisë, kjo pasi siç thotë ajo, kishte munguar shumë herë.